a[Ro 3:20; Ga 2:16]

Psalms 143

Te Devitgo asęani balia po me deli dao.

Bidi me deligo te Godiba gedu haluasa po weyu, aga tau somainu yai

1Genuai Bidi, eno homugo nago te eno
gedu haluasa po wabo odomainu homu
ebao.
Te eno gela waboba nago olo muao.
Nage doloba pelama, tama nago sesemane sogo
mu po wabo da,
iya, nago eno gedu haluasa po wabo odao, tau sao.
 2Te nago po tųde te ena naga sę bidi me dagaligio.
Magi baso meni, te mena bidi me deligo
te nago gedude magi dwai sę me ebeo.
a

3Te eno boi bidigo te ena pobeasa bilama,
tama ena aiyaba mu elalualio.
Agai ena te be hulia sai pesageba kalabus elama,
tama ena polobadu isai bidi tiwai gana yalio.
 4Tama tialima, eno homu kolesaga te dolobaso,
tama eno haliga te sęgę mu elalubadi geani.
 5Megi da, eno te polobadu pedelali nai
dabeba homu kone ma ebao.
Tama eno te nago yali sę dabe,
me te nago wiegi yai sę dabeba
te eno homu kone ma ebao.
 6Eno nogo si ugwaba siyu,
gedu haluasa po nageba weyu,
tama eno homu noma ogwa waigo
te nage wei mu elama,
te bidigo dogoni wa selama,
tama aga te wę nogone mu ebo tiwai ebao.
 7Genuai Bidi, nago eno gedu haluasa po polo odao.
Magi baso meni, te eno konealubo homu te dolali.
Nage enade geme me duala sigio, tiyu ena isilama,
te ena isali bidi dabego pesageba pidalio.
 8Eno konealubo homu nageba muani.
Tialima, eno homugo te tigidali sogo
kigamu nago eno homu
te nago ena godolo ebo kolesagade
ma homu kone palomainu ilao.
Eno gedu haluasa po nageba naga wabo dao.
Tama tiyu, nago enaba te sunumi
ola mobaso, te eno wali paibao.
 9Genuai Bidi, ena nageba asiyu,
te nago ena tonalumainu ebao.
Nago ena te eno boi bidi dabego nogode ma sao.
 10Nage eno God da,
eno homugo te nago ena bugagia
ola momainu homu eyu,
te eno nago homu wali pabo homu ebao.
Eno homugo te nago homu mobo bidigo
ena bugagia wiegi yai ilimainu homu elama,
tama ena te wiegi yai sunumiba pabo
dodolumainu ebo dao.
 11Genuai Bidi, nago ena ma sao,
te nago po dąų walali tiwai gilama yao.
Nage doloba pai bidi mu da,
tama tiyu te nago nogi aiyaba pidali weyu,
te tigidali sęgę enaba pedalubode
te nago ena ma sao.
 12Nago ena tigidali sogo wei mu ebo dao,
tama te kolesaga ebo sia sogobeo.
Tama nago te boi bidi dabe,
me te ena dolabo bidi dabe ela muao,
magi baso meni, ena te nago sę bidi bidibaso,
te tama tiao.
Copyright information for MPS